Хэрлэн сумын Засаг дарга бөгөөд Чойбалсан хотын захирагч С.Мөнхжаргалын санаачилгаар МУИС-ийн зүүн бүсийн сургууль болон Дорнод Политехникийн коллеж нь БНСУ-ын Кванжу их сургуультай хамтран ажиллах тухай зөвшилцөлд гарын үсэг зурлаа. Уг хамтын ажиллагааны хүрээнд боловсрол, соёл, шинжлэх ухааны чиглэлээр хамтын солилцоог өргөжүүлэн хүний нөөцийн чадавхийг бэхжүүлж, олон улсын хэмжээнд мэргэжлийн боловсон хүчин бэлтгэх зорилго тавьж байна.
Тус сургуулийн оюутнууд суралцаж байх хугацаандаа Кванжу их сургуулийн Солонгос хэлний онлайн бэлтгэлд хамрагдаж, хэлний төвшингөөс хамааран тус их сургуульд 40-65 хувийн тэтгэлэгт хамрагдан суралцах боломжтой юм.
Энэхүү хамтын ажиллагаа нь оюутнуудад дэлхийн түвшний боловсрол эзэмших, олон улсын хөдөлмөрийн зах зээлд илүү өрсөлдөх чадвартай болох өргөн боломжийг нээж өгч байгаагаас гадна суралцангаа ажиллах боломжийг олгож байна.
